Þú ert hér: Vinna um víða veröld / Tungumálanám / Enska / Malta
23.10.2017 : 11:39 : +0000

Um Möltu

Malta er sannkölluð paradís ferðamannsins þar sem hún er staðsett í hjarta Miðjarðarhafsins. Malta er eyjasklasi, sem samanstendur af sjö eyjum og eru aðeins þrjár þær stærstu byggðar, Malta, Gozo og Comino. Eyjarnar eru staðsettar sunnan við Ítalíu og norður af norðurströnd Afríku. Þær eru syðsta og sólríkasta ríki Evrópu. Landslagið er láglent, þurrt og grýtt og hamrabelti meðfram fjörðóttum ströndum.

Vegna legu eyjanna voru þær hernaðarlega mikilvægar og guldu fyrir með heimsókn fjölda innrásaraðila. Föníkumenn, Karþagómenn, Grikkir, Rómverjar, Arabar, Normanar, Spánverjar, Ítalir og Frakkar og síðast Bretar gerðu innrás hver á fætur öðrum í aldanna rás, tóku völdin og ríktu í mislangan tíma. Það fór ekki hjá því að allar þessar innrása þjóðir settu sín merki á eyjarnar og státa þær nú af 7000 ára gamalli sögu ríkri af ómetanlegri menningu og minjum.

Árið 60 e.k. var Páll postuli skipreika á eyjunum á leið sinni til Rómar og var  bjargað af Möltubúum. Kannski bjargaði það líka kristninni en alla vega tókst Páli um leið að breiða út boðskap kristninnar á Möltu.

Í dag eru Möltubúar rómversk-kaþólskir og mjög trúhneigðir sem sést best á kirkjusókn ungra og aldna í hinum mörgu, ægifögru kirkjum þeirra.

Stórveldistími Möltu stóð frá árinu 1530 til 1798, þegar Mölturiddarar af reglu Jóhannesar stofnuð á krossferðartímabilinu réðu ríkjum á Möltu. Hin miklu mannvirki sem þeir reistu svo sem varnarvirki, hallir og kirkjur vekja verðskuldaða undrun og athygli allra sem heimsækja landið. Í lok 18. aldar birtist svo sjálfur Napóleon Bonaparte og sölsaði eyjarnar undir sig en sú gleði hans stóð stutt. Möltubúar báðu Breta um hjálp sem þeir fengu. Bretar ríktu svo á Möltu í 160 ár eða til ársins 1964 þegar Möltubúar fengu sjálfstæði og urðu svo fullvalda og sjálfstætt lýðveldi árið 1974. Vegna langrar veru Breta varð enska jafnt sem maltneska opinbert tungumál Möltu.

Sólin skín allan ársins hring á Möltu; veðráttan er heilnæm og yndisleg; sjórinn er hlýr og hreinn vegna legu Möltu í miðju Miðjarðarhafi þar sem straumar halda sjónum hreinum og lifandi. En það er ekki bara sjórinn, sem er hlýr og bjartur. Fólkið er hæverskt, hjálpsamt, vingjarnlegt með skopskynið í lagi og það tekur svo sannarlega vel á móti þér.

Margt skemmtilegt er hægt að gera sér til afþreyingar á Möltu, til dæmis synda í tærum sjónum, stunda allskonar sjósport og siglingar, fara á heilsuræktarstöðvar, fara í lengri eða skemmri skoðunarferðir t.d. til Sikileyjar á Ítalíu, kíkja á fjörugt næturlífið, spila golf eða tennis, fara á hina ýmsu tónleika og sjá listviðburði o.fl. ofl. ofl.

 

Við bjóðum upp á enskunámsskeið á Möltu allan ársins hring!

Langar þig að fara í málanám á Möltu? Vinsamlegast hafðu samband Nínukot til að fá nánari upplýsingar.